Փաստ ինֆո

Սոցիալական ապահովության պետական ծառայության նախկին պետ Վազգեն Խաչիկյանի գործով նախագահող դատավորը խորհրդակցական սենյակ է հեռացել. հաջորդ դատական նիստում կհրապարակվի դատավճիռ:

Այսօր Երևանի Կենտրոն և Նորք Մարաշ վարչական շրջանների ընդհանուր իրավասության դատարանում ամբաստանյալները հանդես եկան վերջին խոսքով:

Մասնավորապես` Վազգեն Խաչիկյանn ընդգծեց, որ 2005-2006թ., երբ ինքը զբաղեցրել է Սոցիալական ապահովության պետական ծառայության պետի պաշտոնը, կենսաթոշակները 3 անգամ աճել են: Խաչիկյանի խոսքով` իրեն մեղադրանք առաջադրվելու ժամանակ նա բացակայել է հանրապետությունից, հնարավորություն է ունեցել խուսափել նախաքննությունից, այլ անունով անձնագրի ձեռք բերել, այլ երկրներում բնակվելու հնարավորություն է ունեցել, սակայն կամովին վերադարձել է:

Խաչիկյանը հայտարարեց, որ անկախ նրանից, թե ինչ դատավճիռ կկայացվի, այն կայացվելու է հանուն Հայաստանի Հանրապետության, և ինքը, որպես ՀՀ օրինակելի քաղաքացի, պատրաստ է կրել այն:

Այդուհանդերձ Խաչիկյանը դատարանին խնդրեց օբյեկտիվ և արդարացի դատավճիռ կայացնել:

Մյուս ամբաստանյալներն էլ հիմնականում դատարանին խնդրեցին մեղմ պատիժ նշանակել:

Ամբաստանյալ Հրանուշ Դանիելյանը հայտարարեց, որ զղջացել է կատարվածի համար և դատարանին խնդրեց մեղ պատիժ սահմանել:

Համլետ Մարտիրոսյանն էլ հայտարարեց, որ գումար չի յուրացրել, սակայն իրեն մեղադրանք առաջադրվելուց հետո պետությանը պատճառված վնասն իր մասով փոխհատուցել է: Նրա խոսքով՝ այս 2 տարիների ընթացքում իր առողջությունը քայքայվել է՝ խնդրելով  մեղմ պատիժ նշանակել:

Ամբաստանյալ Արթուր Սուքիասյանը նշեց, որ առաջադրված մեղադրանքում իրեն մեղավոր է ճանաչել՝ ակնկալելով մեղմ պատիժ։ 

Դատարանից մեղմ վերաբերմունք խնդրեց նաև Սարգիս Սարգսյանը:

Իսկ ամբաստանյալ Սամվել Էլբակյանը խնդրեց արդարացնել իրեն՝ հայտարարելով,որ յուրացում չի կատարել, այլ կանխել է այն:

Արման Խաչատրյանը և Բագրատ Մուրադյանը փաստեցին, որ պետությանը պատճառված վնասն ամբողջությամբ փոխհատուցել են և խնդրեցին արդարացի դատավճիռ կայացնել:

Իսկ ամբաստանյալ Վահագն Խաչատրյանն իրեն մեղավոր չճանաչեց։ Ըստ նրա՝ ինքը կատարել է աշխատանքային պարտականությունները, որի ընթացքում հնարավոր է՝ եղել են թերացումներ, սակայն վկայակոչեց նաև մեկ այլ օրինակ, երբ 7մլն. դրամի օգուտ է տվել պետությանը. «Գիշեր- ցերեկ, շաքարի բարձր գրաֆիկով աշխատել եմ և ինչու պետք է 130 մլն ուրիշի փոխարեն վճարեմ»: Նա պահանջեց արդարացի վճիռ կայացնել և համաներմամբ դատարանի դահլիճից իրեն ազատ արձակել:

Վիգեն Գևորգյանն էլ հայտարարեց, որ ոչ օբյեկտիվ քննություն է կատարվել՝ չհամաձայնելով պատճառված վնասը համապարտորեն բոլորից գանձելու որոշման հետ:

Հովհաննես Գրիգորյանը և Աշոտ Աբրահամյանը հրաժարվեցին վերջին խոսք ասելուց: