Փաստ ինֆո

«Փաստինֆո»-ին հաջողվել է նոր մանրամասներ իմանալ ԱԱԾ վարույթում քննվող «ԱրմենՏել»-ի բարձրաստիճան պաշտոնյաների կողմից թույլ տրված չարաշահումների փաստով հարուցված քրեական գործի մասին:

Նախկինում արդեն հայտնել էինք, որ գործի շրջանակներում ընկերության նախկին բարձրաստիճան աշխատակիցներից մեկը կալանավորվել է արտերկրում:  Մեզ հաջողվել է պարզել, որ խոսքը գնում է ընկերության տեխնիկական տնօրեն, ծնունդով բելառուսցի, ՌԴ քաղաքացի Վլադիմիր Սաչկովի մասին: Քրեական գործի շրջանակներում ՀՀ ԱԱԾ-ում որոշում է կայացվել  նրան միանգամից 4 հոդվածներով` ՀՀ քրեական օրենսգրքի 188-րդ հոդվածի 3-րդ մասի 1-ին և 2-րդ կետերով, 214-րդ հոդվածի 2-րդ մասով, 252-րդ հոդվածի 2-րդ մասի 3-րդ կետով և 253-րդ հոդվածի 1-ին մասով որպես մեղադրյալ ներգրավելու մասին: Այլ կերպ ասած, Սաչկովին Հայաստանում մեղադրում են ապօրինի ձեռնարկատիրության համար, որը զուգորդվել է պետությանն առանձնապես խոշոր չափի վնաս պատճառելով և կատարվել է կազմակերպված խմբի կողմից, իր լիազորությունները չարաշահելու համար, որն առաջացրել է ծանր հետևանքներ, համակարգչում, համակարգչային համակարգում, պահվող տեղեկատվությունը փոփոխելու համար, որը կատարվել է մի խումբ անձանց կողմից նախնական համաձայնությամբ և համակարգչային սաբոտաժի համար:

«Փաստինֆո»-ի տեղեկություններով, Վլադիմիր Սաչկովը քրեական գործում որպես մեղադրյալ է ներգրավվել դեռեւս փետրվար ամսին եւ նրա նկատմամբ հետախուզում էր հայտարարվել: Իսկ մայիս ամսին նա հայտնաբերվել ու ձեբակալվել է Բելառուսի մայրաքաղաք Մինսկում: Ու թեև ՀՀ գլխավոր դատախազությունը հենց մայիսին, Քիշնևի կոնվենցիայի հիման վրա դիմել էր Բելառուսի դատախազությանը Սաչկովին քրեական պատասխանատվության ենթարկելու համար Հայաստանին հանձնելու միջնորդությամբ, սակայն առ այսօր նա Հայաստան չի տեղափոխվել: Մեր տեղեկություններով Մինսկը պաշտոնապես բավարարել է հայկական կողմի միջնորությունը, սակայն Սաչկովը ջանքեր չի խնայում` իրեն Հայաստանին հանձնելը ձախողելու համար:

Մեկ հետաքրքիր հանգամանք ևս: Անգամ հանձնման պարագայում Վլադիմիր Սաչկովն իրեն ռաջադրված ոչ բոլոր մեղադրանքներով կարող է պատասխանատվության ենթարկվել, քանի որ Մինսկը միայն երեք հոդվածով է բավարարել ՀՀ դատախազության միջնորդությունը: Խնդիրն այն է, որ համակարգչային սաբոտաժը (ՀՀ քրեական օրենսգրքի 253-րդ հոդվածով) Բելառուսի օրենսդրությամբ հանցանք չի համարվում: Ինչևէ, արդեն 4-5 ամիս է, ինչ Սաչկովի արտահանձնման գործընթացն անհարկի ձգձգվում է.  վերջինը գործի է դնում իր  բոլոր կապերն ու հնարավորությունները: Նա անգամ դիմել է Բելառուսի իշխանություններին` փախստականի կարգավիճակ և այդ երկրի  իշխանությունների կողմից հատուկ պաշտպանություն  ստանալու համար: Բացի այդ Սաչկովը նաև, որոշ տեղեկություններով, անձնագրի հետ կապված խնդիր ունի, ինչը նույնպես խոչընդոտում է նրան Հայաստան տեղափոխելուն: Հենց այս հանգամանքների պատճառով էլ գործընթացն այս պահին մասամբ կասեցված է:

Ի դեպ, ինչպես նախկինում հայտնել ենք, այս գործի շրջանակներում հետախուզում է հայտարարված նաև «ԱրմենՏել» ՓԲԸ-ի նախկին տնօրեն Իգոր Կլիմկոյի նկատմամբ: Նա կասկածվում է մի քանի մլրդ դրամի ֆինանսական չարաշահումների մեջ: Մեր ունեցած տեղեկություններով, խոսքը 10-15 մլրդ ՀՀ դրամի մասին է:

Հիշեցնենք, 2009-ի ապրիլից ընկերության ղեկավարությունը ստանձնած Ի. Կլիմկոն 2013-ին սկզբին անսպասելիորեն ազատվեց աշխատանքից` չսպասելով անգամ իր աշխատանքային պայմանագրի ժամկետի ավարտին, որին ընդամենը մի քանի ամիս էր մնացել, և շտապ լքեց Հայաստանը: Հենց այդ ժամանակ էլ տեղեկություններ տարածվեցին, որ նա մեծ ֆինանսական չարաշահումներ է թույլ տվել, այդ պատճառով էլ հեռացվել է պաշտոնից: Այժմ արդեն այս տեղեկություները, կարծես թե, հաստատվում են: