Փաստ ինֆո

Վարդան Ղուկասյանի դստեր փեսացուի սպանության համար 15 տարվա ազատազրկման դատապարտված Հարություն Սարգսյանի պաշտպանը՝ Լուսինե Սահակյանը, անդրադարձել է գործի մանրամասներին՝ նշելով, որ թե նախաքննության, թե դատավարության ընթացքում հիմնավորվել է, որ Հ.Սարգսյանը Կարեն Եսայանի սպանության հետ կապ ունենալ չէր կարող: Այս թեմային անդրադարձել է «Չորրորդ Իշխանություն» օրաթերթ:

Լրատվամիջոցը տեղեկացնում է, որ պաշտպանը դիմել է Վճռաբեկ դատարան՝ բեկանելու առաջին ատյանի դատարանի դատավճիռը և Վերաքննիչ դատարանի որոշումը, սակայն դեռևս պատասխան չկա:

Փաստաբան Լ.Սահակյանն անդրադարձել է նաև գործի մանրամասներին, նախաքննական մարմնի սխալներին և կամայկանություններին:

Ըստ այդմ, փաստաբանի խոսքով՝ Սպարտակ Ղուկասյանն իր ընկերների հետ մի կիսաքանդ տանը հանդիպել է Կարեն Եսայանի հետ և պահանջել  քրոջ հետ նշանադրությանը չգնալ՝ ասելով՝ կքոռանաս, բայց քրոջս չես տեսնի:

Պաշտպանի խոսքով՝ առնվազն տարօրինակ է, որ Կարեն Եսայանի անհետանալուց ընդամենը 40 րոպե անց Վարդան Ղուկասյանի  կողմնակիցները սկսում են նրան որոնել, հայտնաբերում տեսագրություններ:

Լուսինե Սահակյանի կարծիքով՝ իրականում ոստիկանությունը ցանկանում էր, որ այս ամենը բարդվեր հենց Հարություն Սարգսյանի վրա:

Փաստաբանը նաև նշել է, որ Աշոտ Կարապետյանը և Կարեն Բաբակեխյանն անձամբ են ծեծի ենթարկել Հ.Սարգսյանին, որ նա ընդունի, որ ինքն է սպանել Կարեն Եսայանին:

Թերթը միաժամանակ տեղեկացնում է, որ «Հայաստանի Հելսինկյան կոմիտեի» ղեկավար Ավետիք Իշխանյանն իր հերթին վստահեցրել է, որ խոշտանգման փաստի առթիվ իրենք դիմելու են ՄԻԵԴ:

Նա իր խոսքում նաև ասել է, որ դատավորները դատավարություն են սկսում այն դեպքում, երբ որևէ ապացույց չկա:
 
Հոդվածն ամբողջությամբ կարող եք կարդալ «Չորրորդ Իշխանություն» օրաթերթի` 22.10.2014թ. համարում: