Փաստ ինֆո

Սևանի քաղաքացիական կացության ակտերի գրանցման բաժնի պետ Մանուշ Կիրակոսյանի նկատմամբ խափանման միջոց է ընտրվել կալանավորումը: Այս մասին «Փաստինֆո»-ին տեղեկացրեց ՀՀ ԱԱԾ  մամուլի քարտուղար Արծվին Բաղրամյանը:

Հիշեցնենք՝ Մանուշ Կիրակոսյանը ԱԱԾ մարմինների կողմից ձերբակալվել էր սեպտեմբերի 23-ին՝ իր աշխատավայրում կաշառք ստանալու պահին:
 
Կաշառք ստանալու դեպքով ԱԱԾ քննչական վարչությունում հարուցվել է քրեական գործ՝ ՀՀ քրեական օրենսգրքի 311-րդ հոդվածի 3-րդ մասի 3-րդ կետի հատկանիշներով:

Ըստ գործի նյութերի՝ Երևան քաղաքի բնակիչ Ռ.Իսկանդարյանը, խնդիրներ ունենալով Ռուսաստանի Դաշնության միգրացիոն օրենքի հետ, դիմել էր Մանուշ Կիրակոսյանին, որպեսզի վերջինն իրեն ամուսնության կեղծ վկայական տրամադրի, ինչի արդյունքում ինքը կկարողանա փոխել ազգանունը, ստանալ նոր անձնական տվյալներով նոր անձնագիր և արդեն նոր փաստաթղթերով հնարավորություն կստանա կրկին մեկնել ՌԴ:

Մանուշ Կիրակոսյանն էլ համաձայնել էր առանց համապատասխան փաստաթղթային հիմքերի և ձևակերպումների, ամուսնության կեղծ վկայական տրամադրել 500 ԱՄՆ դոլար գումարի դիմաց:

Հենց այս գումարը ստանալու պահին էլ նա ձերբակալվել էր, իսկ ավելի ուշ` կալանավորվել: