Փաստ ինֆո

Մասիսի բժշկական կենտրոնի տարածքում հայտնաբերված ներարգանդային փուլում գտնվողը պտուղների գործով մեղադրանքներ են առաջադրվել «Առողջապահության զարգացման կենտրոն» ՍՊԸ-ի հիմնադիր մասնակցին և նրա դստերը:

Ինչպես ավելի վաղ տեղեկացրել էինք, երեք օրվա ընթացքում Մասիսի բժշկական կենտրոնի տարածքում հայտնաբերվել էին ներարգանդային փուլում գտնվողը 2 պտուղ. մեկը՝ ինֆեկցիոն բաժանմունքի մոտ, երկրորդը՝ դիահերձարանին հարող տարածքում: Այս մասին «Փաստինֆո»-ին հայտնել էին  Ոստիկանության լրատվության բաժնից` տեղեկացնելով, որ հարուցվել են քրեական գործեր եւ միացվել մեկ վարույթում:

Քննության ընթացքում հայտնաբերվել են այլ պտուղներ եւս: Պարզվում է` «Առողջապահության զարգացման կենտրոնը» պարզապես չի ոչնչացրել կենսաբանական թափոնները: «Փաստինֆ»-ին հայտնի դարձավ, որ այս ընկերությունը մի շարք բժշկական կենտրոններից ընդունել է կենսաբանական թափոններ, սակայն, խախտելով սանիտարահակահամաճարակային կանոնների և նորմերի պահանջները, չի տեղափոխել և վնասազերծել ընկերության տարածքում լցված բժշկական վարակիչ թափոնները:

Ավելին, ըստ մեր տեղեկությունների՝ դեպքի վայրի զննությամբ ընկերության վարձակալած տարածքում և դրան հարակից տարածքից հայտնաբերվել են այլ թափոններ ևս՝ մասնավորապես ակնհայտ կազմավորման փուլում գտնվող երեխայի 7 դի:

Նշանակվել են մի շարք փորձաքննություններ, որոնց մի մասը դեռևս ընթացքի մեջ են:

Պարզվել է նաև, որ ընկերության կողմից ներարգանդային փուլում գտնվող այդ պտուղները շրջակա միջավայրի համար վտանգավորության 3-րդ և 4-րդ դասի վտանգավոր թափոններ են:

Մեղադրանքներ են առաջադրվել հայր և դուստր Խանդանյաններին՝  «Առողջապահության զարգացման կենտրոն» ՍՊԸ-ի հիմնադիր մասնակցին  և նրա դստերը, ով մոտ 1 տարի՝ 2013թ. փետրվարից մինչեւ 2014 թ մարտն ընկած ժամանակահատվածը, դե յուրե հանդիսացել է  ընկերության տնօրեն, սակայն ըստ էության ընկերության գործունեությամբ զբաղվել է հայրը:

Դստերը մեղադրանք է առաջադրվել ՀՀ քրեական օրենսգրքի 284-րդ հոդվածի 1-ին մասով (վտանգավոր քիմիական և կենսաբանական նյութերի ու թափոնների հետ վարվելու անվտանգության կանոնները խախտելը), իսկ հորը`  38-284-րդ հոդվածի 1-ին մասով: