Փաստ ինֆո

Ինչպես և սպասվում էր, Միխայիլ Բաղդասարովին պատկանող «Միկա» մարզական համալիրն իր ողջ գույքով անցավ ֆինանսների նախարարությանը:

Բանն այն է, որ մինչև սեպտեմբերի 4-ը հայտարարված աճուրդում գնորդ այդպես էլ չի հայտնվել, որից հետո մարզադաշտն անցել է պետության, տվյալ դեպքում` ֆինանսների նախարարության հաշվեկշիռ:

«Միկա»-ի մարզադաշտն, ի դեպ, պետականացվեց ոչ թե իր, այլ՝ նույն սեփականատիրոջը պատկանող մեկ այլ ընկերության` «Արմավիա»-ի ունեցած պարտքերի դիմաց:

Այս պարտքը  կուտակվել էր դեռևս 2010-12 թվականներից, բայց դրա բռնագանձման պահանջով ՊԵԿ-ը միայն այս տարվա հուլիս ամսին է դիմել դատարան:

«Արմավիա» ավիաընկերության` պետական բյուջեին ունեցած պարտքը կազմում է 24 269 365 000 դրամ: Իսկ «Միկա» մարզադաշտը գնահատվել է 9 045 100 000 դրամ արժեքով:

Մեր հարցին, թե ի՞նչ կարգով է պետությունը Միխայիլ Բաղդասարովից բռնագանձելու մնացած՝ ավելի քան 15 մլրդ դրամը, ֆինանսների փոխնախարար Պավել Սաֆարյանը չբացառեց, որ գործարարին պատկանող ընկերությունների նկատմամբ սնանկության գործընթաց կսկսվի:

Հիշեցնենք՝ իրենց սնանկ լինելու մասին «Արմավիա»-ի ղեկավարությունը հայտարարում էր դեռս 2013թ. սկզբին, երբ ֆինանսական դժվարությունների պատճառով ազգային ավիափոխադրողը դադարեցրեց իր թռիչքները, սակայն սնանկության գործընթաց այդպես էլ չսկսվեց՝ գոնե մինչև Բաղդասարովին պատկանող «Միկա» մարզահամալիրի պետության հաշվեկշռին անցնելը: