Փաստ ինֆո

Այսօր կեսօրին՝ ժամը 13:00-ին, ավարտվում է Կարեն Դեմիրճյանի անվան մարզահամերգային համալիրի վաճառքի համար հայտարարված աճուրդի ժամեկտը: ԴԱՀԿ ծառայության պաշտոնական կայքի համաձայն՝ առ այս պահը համալիրը գնելու որևէ առաջարկ չի ստացվել:

Հիշեցնենք՝ օգոստոսի 14-ին հայտարարված այս աճուրդը համալիրը վաճառելու արդեն 6-րդ ու, թերևս, վերջին փորձն է: Բանն այն է, որ աճուրդի ավարտից անմիջապես հետո կսկսվի արդեն ՄՀՀ-ն պետականացնելու գործընթացը, քանի որ ՀՀ կառավարությունն իր՝ օգոստոսի 21-ի նիստում պետությանն ունեցած պարտքի դիմաց այն սեփականատիրոջից հետ վերցնելու որոշում էր կայացրել:

Ի դեպ, նշենք, որ ըստ օրենքի՝ եթե գույքը չի վաճառվում, հերթական հաջորդ աճուրդը կարող է հայտարարվել 3 աշխատանքային օր հետո: Այսինքն՝ կառավարությունը կարող էր այդ որոշումը կայացնել արդեն աճուրդի ավարտից հետո` առաջիկա հինգշաբթի օրը նախանշված նիստում:

Մեր հարցին, թե ինչո՞վ է պայմանավորում գործադիրի նման շտապողականությունը, ՄՀՀ լրատվության և հասարակայնության հետ կապերի պատասխանատու Կորյուն Գրիգորյանն այսպես պատասխանեց. «Ամբողջ խնդիրը կայանում է նրանում, որ նրանք ամեն կերպ փորձում են խնդիրը լուծել, որովհետև այնպիսի մի փակուղի է մտել, որ ո’չ աջ կգնաս այդ պայմանագրով, ո’չ՝ ձախ»:

Ի դեպ, Կորյուն Գրիգորյանի խոսքով, կառավարության հետ կնքված վարկային պայմանագիրը նախատեսում է նաև մարման ժամկետը երկարաձգելու իրավունք, սակայն այդ կետից օգտվելու հնարավորություն ՄՀՀ-ի ղեկավարությանը կառավարությունը չի տվել:

«Մենք փորձեցինք օգտվել մեր այդ իրավունքից, սա շատ կոնկրետ ձևով ուղղակի մերժվեց: Մերժվեց ինչի՞ համար, որովհետև որքան երկար է մնում այդ պայմանագիրն ուժի մեջ, այնքան բոլորին ակնհայտ երևում է, որ պետբյուջեից կորել է 25 մլն դոլար»,- ասաց մեր զրուցակիցը` ակնարկելով պետական բյուջեին ունեցած իրենց պարտքը, որ վերջին 2 տարիների բյուջեում չի արձանագրվել:

«Մենք խնդրել են անգամ պարտքի գումարը ճշտել, ֆինանսների նախարարությունը պատասխանում է` աննպատակահարմար ենք համարում պարտքի գումարը ճշտելը, որոհետև դիմել ենք դատարան: Լավ եք արել, որ դիմել եք, բայց պարտքի գումարը դուք պարտավոր եք ճշտել, չէ՞ որ դա բավականին մեծ գումար է, և մի փոքր շեղումն էական տարբերություն է տալիս»,- ասաց մեր զուցակիցն ու հավելեց. «Մութ գործարք են արել, ու հիմա ինչ-որ ձև են ման գալիս՝ արագ, հապճեպ այդ վիճակից դուրս գալու: Ես հասկանում եմ, որ հիմա կառավարությունն ընկել է կրակը՝ նախկին կառավարության արածի համար»: