Փաստ ինֆո

Սեպտեմբերի 1-ից ուժի մեջ կմտնեն «Բարձրագույն և հետբուհական մասնագիտական կրթության մասին» օրենքում կատարված փոփոխությունն ու լրացումները, որոնցով, մասնավորապես, սահմանվում են բուհերի կողմից որոշ կատեգորիաների ուսանողներին ուսանողական նպաստի ձևով իրականացվող ուսման վարձի մասնակի փոխհատուցման չափերը:

Ըստ այդմ, սահմանվում է, որ ԲՈՒՀ-ը մասնակի փոխհատուցումը տրամադրելու է վճարովի համակարգում սովորող ուսանողական համակազմի առնվազն տասը տոկոսին` ուսանողների վարձավճարներից գոյացած բյուջեի առնվազն յոթ տոկոսի չափով, իր միջոցների հաշվին` հիմք ընդունելով բարձր առաջադիմությունը և սոցիալական խումբը:

Մասնավորապես,  սոցիալապես անապահով, այն է՝ ընտանիքների անապահովության գնահատման համակարգում հաշվառված անապահովության 0 միավորից բարձր միավոր ունեցող ընտանիքների, ուսանողներին ուսանողական նպաստի ձևով տրվելիք ուսման վարձի մասնակի փոխհատուցումը կազմելու է առնվազն 20 տոկոս:

Սոցիալապես անապահով (ընտանիքների անապահովության սահմանային միավորից բարձր միավոր ունեցող ընտանիքների) ուսանողներին, երեք և ավելի անչափահաս կամ երեք և ավելի ուսանող երեխա ունեցող ընտանիքների ուսանողներին, 1-ին կամ 2-րդ խմբի հաշմանդամ, այդ թվում՝ հաշմանդամ ազատամարտիկ ծնող ունեցող ուսանողներին,  ինչպես նաև մարտական հերթապահություն իրականացնող զորամասերում մարտական հերթապահության մեջ ընդգրկված պարտադիր ժամկետային զինվորական ծառայություն անցած ուսանողներին տրվելիք ուսման վարձի մասնակի փոխհատուցումը կազմելու է առնվազն 30 տոկոս:

18 տարին լրանալուց հետո առանց ծնողական խնամքի մնացած ուսանողներին մինչև 23 տարին լրանալը, 23 տարին չլրացած միակողմանի ծնողազուրկ (միածնող) ուսանողներին, ինչպես նաև մինչև մեկ տարեկան երեխա ունեցող ուսանողներին տրվելիք մասնակի փոխհատուցումը կազմելու է առնվազն 50 տոկոս:

Մասնակի փոխհատուցում կարող է տրվել  նաև տվյալ բարձրագույն ուսումնական հաստատության կողմից սահմանված՝ այլ կարգավիճակ ունեցող ուսանողներին:

Բացի այդ, ուսանողական նպաստի ձևով ուսման վարձի մասնակի՝ առնվազն 50 տոկոսի չափով փոխհատուցում տրամադրվում է ուսանողական նպաստների համակարգում չընդգրկված երկու կիսամյակ անընդմեջ առավել բարձր առաջադիմություն ցուցաբերած ուսանողներին, որոնք ուսանողական նպաստի ձևով ուսման վճարի փոխհատուցման համար անցկացված փոխատեղման մրցույթի արդյունքում զրկվել են նպաստի իրավունքից մինչև 0.1 միավոր տարբերությամբ:

Վերոհիշյալ, ինչպես նաև այլ իրավական ակտերով սահմանված մի քանի արտոնություններին հավակնելու դեպքում ուսանողը կարող է օգտվել դրանցից միայն մեկից, որի դեպքում կիրառվում է մասնակի փոխհատուցման առավելագույն չափը:

Ուսանողական նպաստի ձևով ուսման վարձի մասնակի փոխհատուցումից ուսանողը կարող է օգտվել բարձրագույն ուսումնական հաստատությունների կողմից բակալավրի և մագիստրոսի համար սահմանված միջին որակական գնահատականի (ՄՈԳ) շեմը հաղթահարելու դեպքում:

Առաջին կուրսի ուսանողները ուսման վճարի մասնակի փոխհատուցման իրավունքից կարող են օգտվել միայն ուսումնառության երկրորդ կիսամյակից սկսած: