Փաստ ինֆո

2012թ. հունիս 17-ին «Հարսնաքար»  ռեստորանային համալիրի տարածքում բռնարարքի գործով ամբաստանյալներ Նորայր Հայրապետյանի ու Արման Խաչատրյանի պաշտպան  Երեմ Սարգսյանն այսօր բողոք է ներկայացրել Վճռաբեկ դատարան:

Ինչպես «Փաստինֆո»-ի թղթակցին հայտնեց պաշտպանը, ստորադաս դատարանները թույլ են տվել բազմաթիվ դատական սխալներ, նյութական ու դատավարական իրավունքի նորմերի էական ու կոպիտ խախտումներ:

Երեմ Սարգսյանը վճռաբեկ բողոքում միջնորդում է իր պաշտպանյալ Նորայր Հայրապետյանի մասով ամբողջությամբ բեկանել դատական  ակտը, ուղարկել նոր քննության, կամ արդարադատության շահերից ելնելով բեկանել կամ փոփոխել այն, իսկ Արման Խաչատրյանի մասով՝  նաև կարճել քրեական գործը՝ ըստ էության արդարացնելով նրան:

Պաշտպանը գտնում է, որ դատարանների հիմնավորումները չեն համապատասխանում դատարանում  հետազոտված ապացույցներին: Դատարանները  արժանահավատ են համարել տուժողների ցուցմունքները և անարժանահավատ՝ ամբաստանյալների ցուցմունքները այն դեպքում,  որ տուժողները տվել են «առավել քան հակասական ցուցմունքներ», ավելին՝ նրանց ցուցմունքները որոշ դեպքերում հաստատում են ամբաստանյալների նշած հանգամանքները:

Ըստ պաշտպանի, ինչպես մեղադրական եզրակացությունն ու մեղադրանքները, այնպես էլ դատավճիռը անարդար է, իսկ համանման պատժաչափերն էլ՝  աննախադեպ իրենց խստությամբ:  «Եթե դեպքը տեղի չունենար «Հարսնաքար» ռեստորանային համալիրի տարածքում, այլ մեկ այլ վայրում, այդպես չէր լինի»,- գտնում է Ե.Սարգսյանը:

Ավելին՝  գործով կայացվել է կամայական դատավճիռ՝ ամբաստանյալների արարքները չեն անհատականացվել ու կայացվել են միահավասար  պատիժներ՝ բոլոր վեց ամբաստանյալները դատապարտվել են 12-ական տարվա ազատազրկման և 100-ական դրամի տուգանքի:

Պաշտպանը Նորայր Հայրապետյանի մասով անհիմն է համարում ՀՀ քրեական օրենսգրքի  112-րդ հոդվածի 2-րդ մասի 6-րդ կետով մեղադրանքը՝ մի խումբ անձանց կամ կազմակերպված խմբի կողմից դիտավորությամբ առողջությանը ծանր վնաս պատճառելը՝ վեճը ծագել է հանկարծակի, հանգամանքների բերումով, որևէ դիտավորություն չի եղել:  Եթե դատարանը հիմնավոր համարի, որ Վահե Ավետյանը մահացել է Ն.Հայրապետյանի հարվածից, ապա, ըստ պաշտպանի,  իր պաշտպանյալին պետք է մեղադրանք առաջադրվեր 112-րդ հոդվածի 2-րդ մասի 14-րդ  կետով՝ դիտավորությամբ առողջությանը ծանր վնաս պատճառելը,  որն անզգուշությամբ առաջացրել է տուժողի մահը և 118-րդ հոդվածով՝ ծեծը՝  տուժող Գարիկ Սողոմոնյանին ապտակելու համար:

Իսկ Արման Խաչատրյանի մասով, ըստ պաշտպանի, ընդհանրապես, չկա ապացույց, որ նա մասնակցել է ծեծկռտուքին:

Եթե Վճռաբեկ դատարանն  էլ մերժի իր բողոքը, ապա Երեմ Սարգսյանը մտադիր է դիմել Մարդու  իրավունքների եվրոպական դատարան: