Փաստ ինֆո

25-ամյա երիտասարդը մեղավոր է ճանաչվել մանկական պոռնոգրաֆիկ նյութեր տարածելու և անչափահասների նկատմամբ անառակաբարո գործողություներ կատարելու համար: Ընդ որում, այս  ամենը կատարվել է վիրտուալ շփումների ձևով` համացանցում, Երեւանում:

1989 թվականին ծնված Արթուրը (անունը փոխված է) Աջափնյակ և Դավիթաշեն վարչական շրջանների ընդհանուր իրավասության դատարանի դատավճռով դատապարտվել է 4 տարվա ազատազրկման այն բանի համար, որ իր տան համակարգչով կապ է հաստատել անչափահաս տղաների հետ և նրանց պոռնոգրաֆիկ տեսանյութեր ուղարկել:

Նախաքննությամբ ու դատաքնությամբ պարզվել և հիմնավորվել է, որ Արթուրը «odnoklаssniki.ru» սոցիալական կայքի, իր ստեղծած, սեռական բնույթի արտահայտություններ պարունակող անհատական էջի միջոցով, սեփական սեռական պահանջմունքների բավարարման դրդումներով այցելել է, գործով անցնող 7-12 տարեկան տղաների անձնական էջեր, նրանց հետ սեռական բնույթի զրույցներ վարել, առաջարկել դիտել մանկական պոռնոգրաֆիկ ֆիլմեր և նույնիսկ տեսակապի միջոցով նրանց ներկայացրել իր ձեռնաշարժության տեսագրությունը:

Հետաքրքրական է, որ այս հանցագործությունը բացահայտվել է միայն երեխաներից մեկի շնորհիվ, ով իր էջ այցելած տարօրինակ հյուրի մասին հայտնել է հորը: Հայրն էլ, չբացահայտելով իր ով լինելը, երեխայի փոխարեն, նրա անունից շարունակել է շփվել և այդ ընթացքում նաև փաստացի նյութեր ու ապացույցներ հավաքել անառակաբարո այցելուի վերաբերյալ: Իսկ հետո այդ նյութերը հանձնել ոստիկաններին:

Ի դեպ, մյուս երեխաների ծնողներն իրենց երեխաներին այցելած վիրտուալ հյուրի ու նրա անպարկեշտ առաջարկների մասին տեղեկացել են միայն այն բանից հետո, երբ որպես վկա հրավիրվել են ոստիկանություն:

Ինքը` ամբաստանյալ Արթուրն առաջադրված մեղադրանքում իրեն մեղավոր է  ճանաչել մասնակիորեն: Նա նշել է, թե «odnoklassniki.ru» կայքով շփվելով երեխաների հետ ու հասկանալով, որ նրանք անչափահասներ են, դադարեցրել է շփումը: Իսկ ինչ վերաբերում է վերջին տղային, ում հոր ջանքերով էլ ինքն, ի դեպ, հայտնվել է դատարանում, ապա ասել է, թե երեխան ինքն է այցելել իր կայքէջ և սեռական բնույթի հարցեր տվել իրեն, ինքն էլ պատասխանել է: Ինչ վերաբերում է իր ձեռնաշարժության տեսագրությանը՝ ամբաստանյալի մոտ հիշողության կորուստ էր նկատվել՝ ասելով, որ այդ մասին, իբր, չի հիշում:

Հետաքրքրական մի հանգամանք ևս. ամբուլատոր դատահոգեբուժական և սեքսոլոգիական հանձնաժողովային փորձաքննությամբ պարզվել է, որ Արթուրը տառապում է «Օրգանական շիզոտիպային խանգարում, իրավիճակով պայմանավորված դեպրեսիվ հակազդում» հոգեկան հիվանդությամբ:

Ըստ մասնագետների, դա նշանակում է, որ դեռ մանկական տարիքում ի հայտ եկած հիվանդությունները հասունացման շրջանում վարքային նկատելի խանգարումների առիթ են դարձել: Եվ, քանի որ փորձաքննվողի մոտ խախտված են եղել հաղորդակցման ունակությունները ապա, դրանք փոխարինվել են վիրտուալ շփումներով: Նա իր համար ստեղծել է վիրտուալ աշխարհ, սոցիալական ցանցում իր շփումները գերադասելով իրական մարդկային շփումներից  և հաճախ ուղեկցելով դրանք սեքսուալ բովանդակության կպչուն մտքերով կամ ֆիքսվածությամբ: Արթուրի անձնային ոչ լիարժեք ձևավորմանը նպաստել են նաև ընտանեկան թերի դաստիարակությունն ու սեռական ոչ ճիշտ` վիրտուալ աշխարհից վերցված տեսաֆիլմերի վրա ձևավորված դաստիարակությամբ:

Այս ամենի հիման վրա, մասնագետները նրան  սահմանափակ մեղսունակ են ճանաչել, բայց դատապարտվելու դեպքում առաջարկել կալանավայրում նրա նկատմամբ նյարդահոգեբույժի հսկողություն և բուժում սահմանել: