Փաստ ինֆո

«Արաբկիր» բժշկական համալիրում 2-ամյա փոքրիկի մահվան գործով այսօրվա դատական նիստում ցուցմունք տվեց մահացած երեխայի հայրը՝ տուժողի իրավահաջորդ Գեորգի Միսակյանը։

Նա դատարանին հայտնեց, որ 2012 թվականի դեկտեմբերի 31-ին՝ ժամը 20-ի սահմաններում երեխան ջերմել է, ցնցումների մեջ ընկել եւ շտապօգնությունը երեխային տեղափոխել է «Արաբկիր» բժշկական համալիր, որտեղ այդ օրը մանկաբույժ Լիլիթ Վարդանյանը զննել է երեխային՝ ասելով,  թե վիրուս է, թոքերի հետ կապված խնդիր չկա։

Երեխայի մոտ գիշերը մնացել է հայրը, իսկ մայրը գնացել է տուն, քանի որ մյուս փոքրիկը մնացել էր տանը։ Տուժողի իրավահաջորդի խոսքով, ամբողջ գիշերվա ընթացքում երեխան  ջերմել է. հոր կանչով բուժքույրը ջերմ իջեցնող դեղ է տվել, որի  ազդեցությունն ավարտվելուց հետո երեխայի ջերմությունը կրկին բարձրացել է։

2013 թվականի հունվարի 1-ի առավոտյան երեխայի մայրն է գնացել հիվանդանոց, իսկ  նշված օրը հերթապահել է մանկաբույժ  Զարինե Այվազյանը։ Երեխայի հայրը նրան այդպես էլ չի տեսել, իսկ մոր խոսքերով Զարինեն առավոտյան եկել է երեխայի մոտ, զննել եւ ասել, որ անհոգ լինեն ու գնացել։  Ամբողջ օրվա ընթացքում բժշկուհին այլեւս չի այցելել երեխային, իսկ քույրերը պարբերաբար այցելել են եւ ջերմ իջեցնող տվել։ Հոր խոսքերով հունվարի 1-ից երեխայի շնչառությունը շատ վատ է եղել եւ դա իրեն անհանգստացրել է, ինչի մասին հունվարի 2-ին տեղեկացրել է մեկ այլ բժշկուհու՝ Իրինա Մամյանին, ում հրահանգով էլ ռենտգեն հետազոտություն են իրականացրել։ Արդյունքում երեխայի հորն ասել են, որ փոքրիկը թոքաբորբ ունի։  Գեորգի Միսակյանի խոսքով, հիվանդանոցում գտնվելու ընթացքում երեխան ոչինչ չի կերել,ներարկիչով ջուր են լցրել բերանը, իսկ երբ հունվարի 2-ին տեսել է, որ երեխան դժվարանում է անգամ ջուրը կուլ տալ վիճաբանել է բժշկուհու հետ, որից հետո վերջինս մի քանի ժամվա ընթացքում 4 բժիշկ է հրավիրել՝ երեխային զննելու համար։

Հունվարի 2-ին երեխայի հայրը տեսանկարել է փոքրիկին, որպեսզի իր մյուս երեխաները տեսնեն նրան, ինչպես նաեւ մտադրվել էր այն  ներկայացնել մեկ այլ բժշկի մոտ, որպեսզի տեսնեն շնչառականը։ Հունվարի 2-ին հայրը փորձել է երեխային ուտելու բան տալ, ինչից փոքրիկը հրաժարվել է եւ նկատելով, թե ինչպես են կապտում երեխայի շուրթերն անմիջապես բժիշկ է կանչել։ Բժշկուհի Իրինա Մամյանն անմիջապես երեխային տեղափոխել է վերակենդանացման բաժանմունք, որից 2 ժամ հետո մի տղամարդ բժիշկ երեխայի հորն ասել է, որ երեխայի սիրտը կանգնել է եւ չեն կարողացել ոչինչ անել։