Փաստ ինֆո

Գյումրիում «Քավոր Հարութ»-ի` Հարություն Խաչատրյանի  տան մոտ հնչած կրակոցների գործով նախաքննությունն ավարտվել է եւ գործն ուղարկվել դատարան: Հիշեցնենք, որ զինված միջադեպի հետեւանքով մահացել է Արտյոմ Կարապետյանը, ով Գյումրիում առավել հայտնի է «Շեկո» մականունով: Իսկ քրեական գործով որպես մեղադրյալ անցնում է Գյումրիի նախկին քաղաքապետի եղբորորդի Վահե Ղուկասյանը:

Ըստ մեղադրանքի, Վահե Ղուկասյանը  2013թ ապրիլի 23-ի առավոտյան, ապօրինի կերպով ձեռք բերված և  իր մոտ պահվող հրազենով փորձել է շատերի կյանքի համար վտանգավոր եղանակով ապօրինաբար դիտավորությամբ կյանքից զրկել Հարություն Խաչատրյանին, սակայն իր կամքից անկախ հանգամանքներով չի կարողացել հանցագործությունն ավարտին հասցնել,  այնուհետև   ապօրինաբար դիտավորությամբ կյանքից զրկել է Արտյոմ  Կարապետյանին և ապօրինի կերպով ձեռք բերել, պահել ու կրել է հրազեն և ռազմամթերք:

Վահե Ղուկասյանին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով՝ սպանություն, 34-104-րդ հոդվածի 2-րդ մասի 6-րդ կետով՝ շատերի կյանքի համար վտանգավոր եղանակով սպանության փորձ և 235-րդ հոդվածի առաջին մասով՝ ապօրինի զենք կրելը:

Վահե  Ղուկասյանի պաշտպան Հայկ Ալումյանը  «Փաստինֆո»-ի թղթակցի հետ զրույցում նշել էր, որ համամիտ չէ  դեպքի վերաբերյալ նախաքննության մարմնի դիրքորոշման հետ:

Նախաքննության մարմնին ներկայացված հայտարարության մեջ  պաշտպանը  պահանջել էր   շարունակել նախաքննությունն ու իրական փաստերը պարզել: «Երկու կողմից կրակոցներ են եղել, դրանցից մեկը դիպուկ է եղել», ուստի, ըստ պաշտպանի, չի կարելի մեղադրել մարդուն ավելի դիպուկ լինելու համար: Կողմը մտադիր է իր դիրքորոշումը հաստատող կոնկրետ ապացույցները ներկայացնել արդեն դատարանում:

Վահե Ղուկասյանն ի սկզբանե իրեն մեղավոր չի ճանաչել առաջադրված մեղադրանքում՝ հայտարարելով, որ իր վրա հարձակում է տեղի ունեցել, որի հետևանքով ինքը գոտկատեղի շրջանում հրազենային վնասվածք է ստացել: Ուստի՝ «մեղավոր» է միայն, որ «հասցրել է պաշտպանվել»: Ի դեպ, պաշտպանական կողմը նախաքննության ընթացքում դիմել էր Վահե Ղուկասյանին տուժող ճանաչելու պահանջով, սակայն դիմումը մերժվել էր: