Փաստ ինֆո

Ազգային ժողովի աշխատակազմի հինգ տասնյակ աշխատակիցներ դիմել են ԱԺ աշխատակազմի ղեկավար Գուրգեն Դումանյանին՝ իրենց աշխատավարձերից կենսաթոշակի  պարտադիր կուտակային բաղադրիչի մասով պահումներ չանելու խնդրանքով:

Այս մասին «Փաստինֆո»-ի թղթակցին ասաց  Հասարակայնության և տեղեկատվության միջոցների հետ կապերի վարչության պետ Գոհար Պողոսյանը:

Ըստ մեր ունեցած տեղեկությունների՝ դիմումատուները, ովքեր հիմնականում ոչ իշխանական խմբակցություններից պատգամավորների օգնականներն են, ոչ միայն խնդրել են պահումներ չիրականացնել մինչև ՍԴ-ի կողմից «Կուտակային կենսաթոշակների մասին» օրենքի՝  այդ բաղադրիչի հետ կապված հոդվածների սահմանադրականության վերաբերյալ որոշում կայացնելը, այլև վերահաշվարկ կատարել հունվար ամսվա համար արդեն իսկ հաշվարկված աշխատավարձերի մասով:

Հիշեցնենք, որ ՀՀ սահմանադրական դատարանը հունվարի 24-ի աշխատակարգային նիստում որոշել է մինչև «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 եւ 86-րդ հոդվածների սահմանադրականության վերաբերյալ» գործի դատաքննության ավարտը կասեցնել «Կուտակային կենսաթոշակների մասին» ՀՀ օրենքի 76-րդ հոդվածի և 86-րդ հոդվածի 3-րդ մասի գործողությունը:    

Օրենքի 76-րդ հոդվածով սահմանվում է  պատասխանատվությունը պարտադիր կուտակային վճարները չկատարելու կամ ուշացումով  կատարելու համար, իսկ 86-րդ հոդվածի 3-րդ մասում նշվում է, որ պարտադիր կուտակային բաղադրիչի մասնակիցները մինչև 2014 թվականի հունվարի 1-ը պետք է օրենքով նախատեսված կարգով կատարեն կենսաթոշակային ֆոնդի և կենսաթոշակային ֆոնդի կառավարչի ընտրություն:

Ազգային ժողովի ոչ իշխանական չորս՝ ՀՅԴ, «Բարգավաճ Հայաստան», «Հայ ազգային կոնգրես» և «Ժառանգություն» խմբակցությունների ներկայացուցիչների դիմումի հիման վրա գործը Սահմանադրական դատարանը քննության կառնի մարտի 28-ին: