Փաստ ինֆո

ՀՀ վճռաբեկ դատարանի քրեական պալատն այսօր բեկանեց «Ղարաբաղ» կոմիտեի անդամ, նախկին պատգամավոր Սամսոն Ղազարյանի դեմ դատավճիռը՝  ՀՀ քրեական օրենսգրքի 178-րդ հոդվածի  3-րդ մասի 1-ին կետով՝  առանձնապես խոշոր չափերի խարդախություն, մեղադրանքի մասով և այդ մասով քրեական հետապնդումը դադարեցվեց՝ հանցակազմի բացակայության հիմքով:  Այս մասին «Փաստինֆո»-ի թղթակցին հայտնեց Ս.Ղազարյանի պաշտպան Վարդան Զուռնաչյանը: 

Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2013 թվականի փետրվարի 13-ի դատավճռով  Սամսոն  Ղազարյանը մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին կետով՝  առանձնապես խոշոր չափերով խարդախություն, և 213-րդ հոդվածի 1-ին մասով՝ Վաշխառությունը, նախատեսված հանցագործությունների կատարման մեջ: Առաջին ատյանի դատարանը  նրա նկատմամբ նշանակել էր պատիժ` ՀՀ քրեական օրենսգրքի 178-րդ հոդվածի 3-րդ մասի 1-ին կետով` ազատազրկում 4 տարի ժամկետով` առանց գույքի բռնագրավման, ՀՀ քրեական օրենսգրքի 213-րդ հոդվածի 1-ին մասով` ազատազրկում` 1 տարի ժամկետով:

«ՀՀ անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011թ. մայիսի 26-ի որոշման կիրառմամբ  Սամսոն Ղազարյանն  ազատվել  էր ՀՀ քրեական օրենսգրքի 213-րդ հոդվածի 1-ին մասով նշանակված պատժից։ 

Վերաքննիչ քրեական դատարանը դատավճիռը թողել էր ուժի մեջ: