Փաստ ինֆո

Սեպտեմբերի 7-ին, երբ 2013թ. հունիսի 1-ին Սյունիքի նախկին մարզպետ Սուրիկ Խաչատրյանի առանձնատան մոտ տեղի ունեցած դեպքի գործով  մեղադրյալներ Տիգրան Խաչատրյանի  և  Զարզանդ   Նիկողոսյանի  նկատմամբ քրեական հետապնդումը դադարեցվեց, դժբախտություն  պատահեց  ՀՀ արդարադատության հետ: Այսօր տեղի ունեցած ասուլիսում   հայտարարեց  գործով միակ մեղադրյալ Արտակ Բուդաղյանի պաշտպան Հայկ Ալումյանը: 

ՊՆ քննչական ծառայությունը երեք որոշում էր ընդունել երեք անձի նկատմամբ քրեական հետապնդումը դադարեցնելու վերաբերյալ: Առաջին երկուսը վերաբերվում են գործով մեղադրյալնել Տիգրան Խաչատրյանին և  Զարզանդ Նիկողոսյանին, որոնց նկատմամբ քրեկան հետապնդումը դադարեցվել է անհրաժեշտ պաշտպանության հիմքով, իսկ երրորդ որոշումը վերաբերվում է դեպքի հետևանքվ սպանված Ավետիք Բուդաղյանին, որի նկատմամբ քրեական հետապնդումը դադարեցվել է նրա մահվան հիմքով: Պաշտպանը նշեց, որ  ՀՀ ՊՆ քննչական  ծառայության որոշումները ոչ մի ընդհանուր բան չունեն իրավաբանության ու տրամաբանության հետ: Որոշումներն ընդունվել են՝ խեղաթյուրելով դեպքի իրական հանգամանքները և հիմնվելով միայն Խաչատրյանների ցուցմունքների վրա: «Մենք այսպես կարող ենք կորցնել հավատը, որ երբևէ Հայաստանում հնարավոր է հասնել արդարության, եթե քիչ թե շատ ազդեցիկ մարդկանց հետ գործ ունենք»,- ասաց Հայկ Ալումյանը՝ հավելելով, որ անպայման բողոքարկելու է այդ որոշումները: 

Պաշտպանը հայտարարեց, որ որևէ  անհրաժեշտ պաշտպանության մասին խոսք լինել չի կարող: Նա հիշեցրեց, որ  դեպքի վայրում  հայտնաբերվել է  13 պարկուճ, որից 11-ն արձակվել է Սուրիկ Խաչատրյանի կողմնակիցների կողմից,  դրանցից հինգը դիպել է Ավետիք ու  Արտակ Բուդաղյաններին՝ առաջինին պատճառելով մահ, իսկ երկրորդին՝ ծանր մարմնական վնասվածք: 

Հ.Ալումյանը   տարակուսանք հայտնեց նաև, որ  Սուրիկ Խաչատրյանի «Բերետտա» տեսակի ինքնաշեն ատրճանակը քննչական մարմինը գնահատել է որպես օրինական զենք: 

Իրավապաշտպան Արթուր Սաքունցն իր հերթին  ընդգծեց, որ  իրավապահ մարմիններն անգործություն են դրսևորել, իսկ ՀՀ զինդատախազ Գևորգ Կոստանյանը «բռնաբարել է արդարադատությունը հրապարակավ», ուստի հետագա հաշվեհարդարների անմիջական պատասխանատվությունը  կրելու է   Հայաստանի Հանրապետությունն՝   ի դեմս զինդատախազի: Ա.Սաքունցի գնահատմամբ, սպանությունը խրախուսելու այս  մոտեցումը  քաղաքացիներին զրկում է  իրավական ճանապարհով հարցը լուծելու իրավունքից և հնարավորությունից, խնդրի լուծումը իրավական դաշտից տեղափոխում վենդետայի դաշտ: 

Լրագրող, իրավապաշտպան  Ժաննա Ալեքսանյանն իր հերթին քննչական մարմնի հիշյալ որոշումները  գնահատեց որպես նախադեպային՝  մինչ այդ գոնե իշխանությունների պաշտպանությունը վայելող անձանց գործերը գոնե հասնում էին դատարան: Ըստ նրա, այս դեպքում ՀՀ զինդատախազը կատարել է արդարադատության երաշխավորի՝  ՀՀ նախագահի  հանձնարարությունը: 

Իրավապաշտպան Ավետիք Իշխանյանը հայտարարեց, որ «սա  շարունակությունն է անպատժելիության մթնոլորտի, ապտակ է բոլորիս դեմքին»: Նա հիշեց  երեք տարի առաջ Սյունիք կատարած իր այցից ստացած տպավորությունները՝ մարդիկ  պատմում էին մարզպետի կողմից ծեծի ենթարկելու, անգամ  սպանություններ կատարելու դեպքերի մասին, սակայն անկարող էին հակազդել դրան, որովհետև գտնվում էին  անպաշտպան ճորտի կարգավիճակում, ինչպես ժամանակին գտնվում էր Ռուսաստանը՝ մինչև ճորտատիրության վերացումը: Իրավապաշտպանը տարակուսանք հայտնեց՝ ինչպե՞ս կարող էր մարզպետի պաշտոնում  նշանակվել քրեական անցյալ, կրթական ցածր ցենզ ունեցող անձը: