Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանում՝ նախագահությամբ  դատավոր Արտուշ Գաբրիելյանի, «Նուբարաշեն»  ՔԿՀ-ի պետի օպերատիվ գծով տեղակալ Դավիթ Մուրադյանի գործով այսօր հարցաքննվեց վկա, դատապարտյալ  Արտակ Հակոբյանը: Նա դատապարտվել է 5 տարվա ազատազրկման խուլիգանության և դանակահարության համար:

Ի դեպ նշենք, որ Մուրադյանի պաշտպան Սեյրան Գրիգորյանը միջնորդեց վկային հարցաքննությունն անցկացնել  դռնփակ՝ հայտարարելով, որ վկայի հարցաքննության ընթացքում հնարավոր է պետական գաղտնիք բացահայտվի:  Դրան ի պատասխան մեղադրողը նկատեց, որ   եթե պետական գաղտնիք է,  այդ պարագայում ոչ ոք չի կարող տեղեկանալ, այդ թվում, թե՛ դատախազը, թե՛ դատավորը և թե՛ ինքը՝ պաշտպանը:

Այնուամենայնիվ դատարանը բավարարեց պաշտպանական կողմի միջնորդությունը և դահլիճում ներկաներին խնդրեց դուրս գալ, միաժամանակ հավելելով, որ հեռու չգնան,  հնարավոր է,  քիչ անց նորից վերադառնան: Պետական գաղտնիք պարունակող տեղեկությունների փոխանակումը 5 րոպե անց ավարտվեց,  և դատավորը  դատական կարգադրիչի միջոցով  դատարանի միջանցքում սպասողներին ներս կանչեց:

Վկան պնդեց նախաքննական մարմնին տված իր ցուցմունքները: Նա հայտնեց, որ  երբ իրեն «Գորիս» ՔԿՀ-ից տեղափոխել են  «Նուբարաշեն» ՔԿՀ՝  ինքը  գտնվել է 57-րդ  խցում, որից 2-3 ամիս անց ծանոթացել է Դավիթ Մուրադյանի հետ, ով  իրեն առաջարկել է վերանորոգել 4-րդ խուցը և տեղափոխվել այնտեղ: 

ՔԿՀ-ում վկայի համար  արտոնյալ պայմաններ են ստեղծել, կրել է ոսկյա զարդեր, տեսակցություններ են տրամադրվել կնոջ հետ, ինչպես նաև «Դատապարտյալների հիվանդանոց»-ում  է գտնվել, և այս ամենը Մուրադյանի միջնորդությամբ, նշում է վկան և հավելում՝    գումարի դիմաց:

Վկան նշեց, որ Մուրադյանն իրեն  առաջարկել է 4-րդ խուցը վերանորոգել,  այնտեղ մնալ մինչև իր վաղաժամկետ ազատ արձակվելու հարցը կլուծի,  «ես հասկացա, որ այդ խուցը վերանորոգել եմ, որ հետո թանգով ծախեն»,- ասաց վկան:

Հարցի հետ կապված վկան նաև ընդգծեց, որ այդ խուցը վերանորոգելով՝  կարծել է, թե իրեն խրախուսական բնութագիր կտան: Դատարանի այն հարցին, թե արդյո՞ք հնարվոր չէր գումարի դիմաց սոցիալ-հոգեբանը իրեն խրախուսական բնութագիր տար, վկան չառարկեց, ասաց.   «Դա ևս տարբերակ է»: 

Ա.Հակոբյանը նշեց նաև, որ իր վաղաժամկետ ազատ արձակվելու համար Մուրադյանին տված գումարները, սկզբում 10 000 ԱՄՆ դոլարը, այնուհետև՝  4000 ԱՄՆ դոլարը Մուրադյանը ետ է վերադարձրել: Ըստ վկայի, Մուրադյանի տան կահույքն ինքը  ևս պատվիրել է իր վաղաժամկետ ազատ արձակվելու հարցը լուծելու նպատակով:

2012թ. օգոստոսից մինչև դեկտեմբեր ամիսների ընթացքում,  ըստ վկայի,   ինքը յուրաքանչյուր ամիս տեսակցությունների համար «Մուրադյանին է տվել 400 ԱՄՆ դոլար, իսկ «Դատապարտյալների հիվանդանոց»-ում գտնվելու յուրաքանչյուր ամսվա համար՝   600 ԱՄՆ դոլար: Երբ Մուրադյանը իր խոստումը չի կատարել, դատապարտյալ Արտակ Հակոբյանը  բողոք է ներկայացրել,  Մուրադյանը և՛ իրեն,  և՛ կնոջը խնդրել է բողոքը ետ վերցնել, խոստանալով, որ ի վերջո իր վաղաժամկետ ազատ արձակվելու հարցը կլուծի:  «Շատ բաներ կա, որ չեմ ասում, որ Մուրադյանը խայտառակ չլինի», հայտարարեց վկան՝  հավելելով, որ «ես իրան ասել եմ ապարանցի եմ, բայց Երևանի ապարանցի,  ինձ չխաբես, ինձ խաբել ա,  դրա համար էլ բողոքել եմ»:

Դատապարտյալ Արտակ Հակոբյանը հայտնեց նաև, որ խուզարկությամբ  առգրավված իր երկու  հեռախոսները ինքը  ետ է ստացել Մուրադյանից:

Վկայի հարցաքննության ընթացքում դատավոր Արտուշ Գաբրիելյանը նկատեց, որ դատապարտյալը լավ իրավաբանություն է սովորել, մնում է օրենսգիրքը ուսումնասիրի:  

Նշենք, որ այսօր դատական նիստին չէին ներկայացել դատակոչված 2 վկա, ովքեր հեռախոսազանգի միջոցով դատարանին հայտնել  էին, որ աշխատանքային  ծանրաբեռնվածության պատճառով չեն կարող ներկայանալ: Հաջորդ՝  սեպտեմբերի 9-ին կայանալիք նիստին վկաների հարցաքննությունը կշարունակվի: