Փաստ ինֆո

Կարինե  Աբազյանը 2012 թվականի դեկտեմբերի 29-ին ժամը 19:30-ի սահմաններում զբաղված էր ամանորյա տոների նախապատրաստման աշխատանքներով, երբ անսթափ վիճակում տուն է վերադարձել  ամուսինը` Արմեն Դավթյանը: Նրանից կինը գումար է պահանջել` առևտուր կատարելու համար, սակայն Արմեն Դավթյանը  սկսել է բղավել և անպատվել Կարինե Աբազյանին, հրաժարվել է գումար հատկացնել գնումներ կատարելու համար: Նրանց միջև խոսակցությունը վերածվել է վեճի, որի ընթացքում Արմեն Դավթյանը հյուրասենյակում դրված աթոռով հարվածել է Կարինե Աբազյանի մեջքին, ինչի հետևանքով աթոռը կոտրվել է, որից հետո Արմեն Դավթյանը շարունակել է կոտրված աթոռի ոտքով հարվածել Կարինե Աբազյանի գլխին և մարմնի տարբեր մասերին: Կինը՝  չկարողանալով դիմադրել Արմեն Դավթյանին` վայր է ընկել և մի պահ ուշագնաց է եղել, այնուհետև ուշքի գալով անմիջապես վազել է դեպի խոհանոց, այնտեղից վերցնելով դանակը, հանկարծակի հարձակվել է Արմեն Դավթյանի վրա և սկզբում հարվածել նրա որովայնի ձախ հատվածին, այնուհետև նրա կրծքավանդակի հետին մակերեսին` պատճառելով վերջինիս առողջությանը ծանր վնաս: 

Դատական նիստի ընթացքում օգոստոսի 14-ին  մեղադրող Ա.Չիչոյանը որոշում է կայացրել Կարինե Աբազյանին ՀՀ քրեական օրենսգրքի 112-րդ  հոդվածի 1-ին մասով՝  Դիտավորությամբ առողջությանը ծանր վնաս պատճառելը,  առաջադրված մեղադրանքը փոփոխելու և նրան    ՀՀ քրեական օրենսգրքի 114-րդ  հոդվածի 2-րդ մասով՝  Հոգեկան խիստ հուզմունքի վիճակում առողջությանը  ծանր   վնաս պատճառելը, մեղադրանք առաջադչելու մասին:  Մեղադրողը հիմնվել է  դատաքննության ընթացքում նշանակված դատահոգեբանական փորձաքննության եզրակացության վրա, ըստ որի  Կարինե Աբազյանը իրավախախտումը կատարելու ժամանակ գտնվել է կոմուլյատիվ աֆեկտի վիճակում, ինչը սահմանափակել է նրա վարքի կամային կառավարման ունակությունը:

ՀՀ քրեական օրենսգրքի 114-րդ  հոդվածի 2-րդ մասով առաջադրված մեղադրանքում ամբաստանյալն իրեն լիովին մեղավոր  է ճանաչել  և խոստովանական ցուցմունքներ տվել:   Այն ժամանակ  հուզված լինելու պատճառով  ամբաստանյալը չի հիշել,  թե քանի հարված է հասցրել Արմեն Դավթյանին և մարմնի որ մասերին: Դրանից հետո Արմեն Դավթյանն ընկել է հատակին, այնուհետև ինքը օգնել է նրան ոտքի կանգնել և տեսնելով, որ ամուսնու վիճակը գնալով վատանում է` օգնել է նրան տեղափոխել «Մալաթիա» բժշկական կենտրոն: Այդ միջադեպի ժամանակ տանը գտնվել են նաև իրենց երկու անչափահաս երեխաները, ովքեր  միջամտել և փորձել են օգնել իրեն: Ինքն անկեղծորեն զղջում է կատարածի համար: 

Տուժող Արմեն  Դավթյանն իր  ցուցմունքով նշել է, որ ինքը հրաժարվել է գումար տրամադրել կնոջը, քանի որ իր մոտ գումար չի եղել: Զայրանալով  Կարինեի խոսքերից՝ ինքը վերցրել է հյուրասենյակի աթոռն ու հարվածել նրա մեջքին, որի հետևանքով աթոռը կոտրվել է, որից հետո կոտրված աթոռի ոտքով ինքը շարունակել է հարվածել Կարինե Աբազյանի գլխին և մարմնի տարբեր մասերին: Դրանից հետո Կարինե Աբազյանը մի պահ ընկել է հյուրասենյակի բազկաթոռին, իսկ որդին` Կարեն Դավթյանը ջուր է լցրել նրա դեմքին, որից հետո Կարինե Աբազյանը ոտքի կանգնելով վազել է դեպի խոհանոց: Այնուհետև ինքը հյուրասենյակում գցելով կոտրված աթոռի ոտքը` գնացել է միջանցք և այլևս նպատակ չի ունեցել հարվածել Կարինե Աբազյանին: Այդ ժամանակ, խոհանցից հանկարծակի դեպի իր կողմ է վազել Կարինե Աբազյանը և ձեռքում եղած խոհանոցային դանակով հարվածել է իր որովայնին և թիկունքին:

Ինքն ընկել է հատակին, սակայն կնոջ և որդու օգնությամբ ոտքի է կանգնել և նստել միջանցքի բազկաթոռին: Դրանից հետո իր առողջական վիճակը վատթարացել է, արյունահոսություն է սկսվել ու Կարինե Աբազյանի օգնությամբ իրեն տեղափոխել են «Մալաթիա»  բժշկական կենտրոն: Ներկայումս իր և Կարինե Աբազյանի հարաբերությունները վերականգնվել են, իրենք ապրում են ամուսնական կյանքով և ինքը չի ցանկանում, որպեսզի կնոջը ենթարկեն քրեական պատասխանատվության: 

Անչափահաս վկա Լաուրա  Դավթյանը հայտնել է, որ ծնողները հաճախակի վիճաբանել են, որի ընթացքում իր հայրը հաճախակի ծեծի է ենթարկել մորը` Կարինե Աբազյանին: Ամանորյա գնումներ կատարելու համար գումար պահանջելու հարցի շուրջ նրանց միջև ծագաած վիճաբանության  ընթացքում հայրը հյուրասենյակի աթոռով հարվածել է մորը, իսկ աթոռը կոտրվելուց հետո նա շարունակել է կոտրված աթոռի ոտքով հարվածներ հասցնել Կ.Աբազյանի մարմնի տարբեր մասերին, որից մայրը վատացել և ուշագնաց ընկել է բազկաթոռին: Ինքը և եղբայրն իրենց մոր` Կ.Աբազյանի դեմքին մի փոքր ջուր են շփել, որից հետո մայրը ոտքի է կանգնել, ինքը գնացել է ննջասենյակ, իսկ եղբայրը մնացել է հյուրասենյակում: Որոշ ժամանակ անց ինքը դուրս է եկել ննջասենյակից և նկատել, որը հայրը նստած է միջանցքում դրված բազկաթոռին, վերջինս խնդրել է շտապօգնություն զանգահարել: Դրանից հետո հայրը և մայրը գնացել են հիվանդանոց, իսկ ինքը եղբորից տեղեկացել է, որ երբ գտնվել է ննջասենյակում, այդ ժամանակ մայրը դանակով հարվածել է հորը: Ինքը մոր ձեռքին դանակ չի տեսել, այն տեսել է միջանցքի հատակին ընկած, դա եղել է իրենց խոհանոցային դանակը:

Երևանի Մալաթիա-Սեբաստիա վարչական շրջանի ընդհանուր իրավասության դատարանը՝  դատավոր Կ.Ֆարխոյանի նախագահությամբ, օգոստոսի 22-ի դատավճռով ապացուցված է համարել, որ ամբաստանյալ Կարինե Աբազյանը 2012 թվականի դեկտեմբերի 29-ին ժամը 19:30-ի սահմաններում իր ամուսնու` Արմեն  Դավթյանի հետ ունեցած կենցաղային հարցերի շուրջ վիճաբանության ընթացքում, գտնվել է կոմուլյատիվ աֆեկտի վիճակում, խոհանոցային դանակով երկու անգամ հարվածել է Արմեն Դավթյանի որովայնին և կրծքավանդակի հետին մակերեսին` վերջինիս հասցնելով կրծքավանդակի հետին մակերեսի կտրած-ծակած, թափանցող վերք, իսկ որովայնին` կտրած-ծակած վերք, Արմեն Դավթյանի առողջությանը պատճառելով  կյանքին վտանգ սպառնացող ծանր վնաս:  

Դատարանը Կարինե  Աբազյանին մեղավոր է  ճանաչել ՀՀ քրեական օրենսգրքի 114-րդ  հոդվածի 2-րդ մասով ու նրան դատապարտել  պայմանական  ազատազրկման 1  տարի ժամկետով՝ 1  տարվա  փորձաշրջանով: 

Պատիժ նշանակելիս դատարանը հաշվի է առել, որ ամբաստանյալ Կարինե Աբազյանը տվել է խոստովանական ցուցմունքներ, անկեղծորեն զղջում է կատարածի համար, նախկինում դատապարտված չի եղել, նրա խնամքին են գտնվում երկու անչափահաս երեխաներ, հանցանքը կատարել է տուժողի հակաօրինական և հակաբարոյական վարքագծի պատճառով: