Փաստ ինֆո

Դատարանը հիմնավորված է համարել մորն ու տատիկին խոշտանգելու համար Գրիգորյան ամուսիններին առաջադրված մեղադրանքը և դատապարտել։ Տարեց կանանց նկատմամբ որդին և հարսը ոչ միայն ֆիզիկական բռնություն են գործադրել, այլ նաև բարոյահոգեբանական՝ նվաստացնելով նրանց արժանապատվությունը։ 

Գուրգեն և Սյուզաննա  Գրիգորյանները  2009 թվականից մինչև 2011թվականի դեկտեմբեր ամիսը վարձակալական հիմունքներով բնակվել են Երևան քաղաքի տարբեր թաղամասերում, սակայն 2011թվականի դեկտեմբերի 26–ից տեղափոխվել և մանկահասակ երեխայի հետ միասին բնակություն  հաստատել ամուսնու հայրական տանը, որտեղ բնակվում էր մայրը՝ Թագուհի Գրիգորյանը,  զառամյալ մոր՝Նազիկ Կարապետյանի հետ: Համատեղ բնակության ընթացքում, ամբաստանյալներ Գուրգեն և Սյուզաննա Գրիգորյանները կենցաղային և տան հետ կապված հարցերով, ամիսներ շարունակ  մարմնական և հոգեկան տառապանքներ են պատճառել, խոշտանգել են Թագուհի Գրիգորյանին, մարմնական վնասվածքներ պատճառել տատիկին։

Վեճերը հիմնականում առաջացել են  բնակարանի կոմունալ ծախսերը հոգալու և այլ կենցաղային հարցերի շուրջ, որոնց արդյունքում ձևավորվել են լարված փոխհարաբերություններ:Ըստ դատավճռի, 2012թվականի փետրվարի 1–ին՝ ժամը 18–ի սահմաններում, հերթական վիճաբանության ժամանակ ամբաստանյալ Գ.Գրիգորյանը խուլիգանական բնույթի հայհոյանքներ է տվել մոր հասցեին, ձեռքերով հարվածել նրա դեմքին, ձեռքերին և մարմնի այլ հատվածներին` նրա առողջությանը պատճառելով թեթև վնաս` առողջության կարճատև քայքայումով, ինչի մասին փետրվարի 6-ին ծեծված մայրը հաղորդում  է ներկայացրել ոստիկանություն։ Հաջորդ իսկ օրը տեղի է ունեցել հերթական վեճը, որի ընթացքում որդին «թքել է մոր դեմքին, բռունցքով հարվածել քթին և մի քանի անգամ ապտակել՚։ Բռնությունը կիրառվել է նաեւ փետրվարի 8–ին.ամբաստանյալ Գ.Գրիգորյանը կենցաղային հարցերի շուրջ կրկին վիճաբանել է մոր հետ,  քաշքշել  նրան, ինչը չհանդուրժելով վիճաբանությանը միջամտել է 82-ամյա տատը՝ Նազիկ Կարապետյանը, որի դեմքին  եւս Գրիգորյանը դիտավորյալ ձեռքով հարվածել է, ապա հրել - գցել է հատակին:

Շարունակելով տան կենցաղային հարցերի հետ կապված վեճերը՝ Գրիգորյան ամուսինները 2012թվականի փետրվարի 10–ի երեկոյան փակել են բնակարանի դուռը` Թագուհի Գրիգորյանին զրկելով բնակարանում ազատ մուտք և ելք կատարելու հնարավորությունից, այնուհետև վեճի բռնվել նրա հետ, «խուլիգանական բնույթի հայհոյանքներ տվել նրա հասցեին, թքել դեմքին ու մարմնի,  գցել են հատակին` պատճառելով ֆիզիկական ցավ և հոգեկան տառապանքներ՚: Ըստ տուժողների, վիճաբանությունն ու բռնությունները եղել են օրվա բաղկացուցիչ մասը ու կրել պարբերական բնույթ։ Ի վերջո, 2012թվականի փետրվարի 29–ին ժամը 18–ի սահմաններում, ամբաստանյալ Գ.Գրիգորյանը կենցաղային հարցերի շուրջ այս անգամ վիճաբանել Է իր 82 տարեկան տատու, գործով մյուս տուժող Նազիկ Կարապետյանի հետ, որի ընթացքում մի քանի անգամ դիտավորությամբ բռունցքով հարվածել Է վերջինիս ուսերին և գլխին` նրա առողջությանը պատճառել ծանր վնաս` կյանքին վտանգ սպառնացող: Ստացված վնասվածքներից  2012 թվականի մարտի 3–ին, տուժող Ն.Կարապետյանի առողջական վիճակը սկսել Է վատթարանալ և տուժող Թ.Գրիգորյանը իր մորը տեղափոխել է ՙԷրեբունի՚ բժշկական կենտրոն, որտեղ վերջինս 17 օր գտնվել Է ստացիոնար բուժման մեջ: 2012թվականի ապրիլի 18–ին, ամբաստանյալ Ս.Գրիգորյանն ամուսնու ներկայությամբ անհիմն վիճաբանել է իր սկեսուրի, Թագուհի Գրիգորյանի հետ՝ նրան անվանարկել, վիրավորել,  քաշել մազերից եւ այսպես օրերը հաջորդել են մեկը մյուսին: Բռնություններից հոգնած կինն ի վերջո դիմել է ոստիկանության օգնությանը՝ նրանց բնակարանից վտարելու համար, ինչը նոր առիթ է դարձել բռնությունների։ 

Տեղեկանալով  մոր քայլի մասին՝  2012թվականի մայիսի 26–ին՝ ժամը 22–ի սահմաններում, կրկին սկսել են վիճաբանել վերջինիս հետ: Փորձելով չներքաշվել վիճաբանության մեջ՝ Թ.Գրիգորյանը վախից գնացել – պառկել է անկողնում, սակայն ամբաստանյալ Գ.Գրիգորյանը մոտենալով նրան, դիտավորությամբ ոտքով հարվածներ է հասցրել անկողնում պառկած մոր կրծքավանդակին, մեջքին, այնուհետև կողերին, երիկամների շրջանին և թքել վրան: Այնուհետև, ամբաստանյալ Գ.Գրիգորյանը կնոջ, գործով մյուս ամբաստանյալ Ս.Գրիգորյանի հետ միասին, տուժող Թ.Գրիգորյանին անկողնուց քաշել - գցել են հատակին, ապա քարշ տալով տարել հյուրասենյակ և շարունակել ոտքերով հարվածել վերջինիս մարմնի տարբեր մասերին, նրա առողջությանը պատճառելով միջին ծանրության վնաս` առողջության տևական քայքայումով: Վախենալով որդուց և հարսից, հետագա տառապանքներից ազատվելու նպատակով մայրը  2012թվականի հունիսի 4–ին կրկին հեռացել է տանից՝ այնտեղ անպաշտպան թողնելով զառամյալ մորը, ինչից օգտվելով` 2012թվականի հունիսի 11–ին ամբողջ բարկությունը թափել են տատու վրա եւ հարվածներ հասցրել նրան:

Դատարանը հիմնավորված է համարել մորն ու տատիկին խոշտանգելու, նրանց նկատմամբ բռնություններ գործադրելու համար նախաքննական մարմնի առաջադրած մեղադրանքները: Գ.Գրիգորյանին դատարանը մեղավոր է ճանաչել ՀՀ քրեական օրենսգրքի 3 հոդվաներով եւ դատապարտել 5 տարվա ազատազրկման, իսկ վերջինիս կնոջը` Ս.Գրիգորյանին մեղավոր է ճանաչել 2 հոդվածով, սակայն դատապարտել պայմանական` սահմանելով փորձաշրջան` 2 տարի ժամկետով` հաշվի առնելով 2 անչափահաս երեխաներին խնամքի տակ ունենալու հանգամանքը: