Փաստ ինֆո

Օլիմպիական խաղերի սպասմամբ ապրող Սոչի քաղաքում իրավապաշտպանները փորձում են քրեական գործ հարուցել մի խումբ ոստիկանների նկատմամբ, ովքեր դաժան խոշտանգումների են ենթարկել ձերբակալված շինարարներին:

Ըստ նախնական տեղեկությունների օրենքի պահապանների գործողություններից տուժել են Սոչի քաղաքի բնակիչ Մարտիրոս Դեմերչյանը և նրա փեսա Սերգեյ Կրբաշյանը:

Նրանք իրենց բրիգադի մյուս անդամներ հետ մարտի 25-ից մինչև մայիսի 16-ը Օլիմպիադա-2014-ի կամավորականների բազմաբնակարանոց շենքում էլեկտրական լարերի մոնտաժման աշխատանքներն են իրականացրել: Այդ աշխատանքի դիմաց բրիգադի յուրաքանչյուր անդամի 90 հազարի փոխարեն վճարվել է 37 հազարական ռուբլի: Դրանից հետո շինարարական տեղամասի վարպետ Սամվել Փաշյանը բրիգադի անդամներին սպառնացել է, որ եթե նրանք համառեն իրենց աշխատավարձի պակասող մասը ստանալու հարցում, ապա ինքը նրանց դեմ քրեական գործ կկազմակերպի իր ծանոթ ոստիկանների օգնությամբ: Հինգ հոգուց կազմված բրիգադի աբխազ 3 անդամները վախենալով Փաշյանի սպառնալիքներից՝ անխոս հեռացել են, իսկ տեղացիները շարունակել են պահանջել իրենց աշխատավարձը:

Համառ բանվորներին վարպետն առաջարկում է հանդիպել հունիսի 12-ին՝ խոստանալով հենց այդ օրն էլ վճարել աշխատավարձի պակասող հատվածը: Սակայն հանդիպման պայմանավորված վայրում՝ Վեսելո գյուղում, բանվորներին դիմավորում են ոստիկանները:

Առանց պարզաբանումների նրանք ոլորում են Մարտիրոս Դեմերչյանի և նրա փեսա Սերգեյ Կրբաշյանի ձեռքերը և տանում Ադլերի շրջանի Բլինովո ավանի ոստիկանական բաժանմունք:

Ամբողջ գիշեր, մինչև հունիսի 13-ը հինգ ոստիկան խոշտանգման են ենթարկում Մարտիրոս Դեմերչյանին, թափում ատամները, դեմքին թողնում արյունածոր վերքեր:

Ըստ «newsru.com»-ի, նրանից չստանալով խոստովանական ցուցմունքներ ուսադիր կրող սադիստները երկաթե լինգով բռնաբարում են տղամարդուն և ստիպում ստորագրել մի մաքուր թուղթ:

Տուժած Մարտիրոս Դեմերչյանի փեսայի՝ Սերգեյ Կրբաշյանի ասելով, իրեն նույնպես ոստիկանները ծեծի են ենթարկել, սակայն գործը չի հասել երկաթե լինգով ստորացումներին:

Այս գործի կապակցությամբ դատարանի որոշմամբ Սերգեյ Կրբաշյանին, ոստիկանության օրինական պահանջներին դիմադրություն ցույց տալու հիմնավորմամբ, ենթարկում են 1000 ռուբլի տուգանքի:

Տուժածների փաստաբան Ալեքսանդր Բոյչենկոն ասել է, որ Դեմերչյանին և Կրբաշյանին խոշտանգումների ենթարկելու վերաբերյալ հայտարարությունը փոխանցվել է ՌԴ Քննչական կոմիտեի Կրասնոդարի երկրամասի վարչություն: Բողոքներ են ներկայացվել նաև ՌԴ Գլխավոր դատախազություն, ՆԳՆ և Անվտանգության դաշնային ծառայություն:

Մեկ ամսվա ընթացքում ՌԴ Քննչական կոմիտեն պետք է որոշում ընդունի իրավապահ մարմինների օրինազանց աշխատակիցների նկատմամբ քրեական գործ հարուցելու վերաբերյալ, ասել է այդ հաստատության տարածաշրջանային վարչության ներկայացուցիչ Իվան Սենգերյովը:

Սակայն, Սոչիի իրավապաշտպաններից շատերը կարծիք են հայտնել, որ այս գործը գրեթե հեռանկար չունի:

Այդ տեսակետին համամիտ են նաև ՆԳՆ-ում, որոնք նշում են, որ տուժածների մարմնի վրա խոշտանգումների հետքեր չեն հայտնաբերվել: