Փաստ ինֆո

«Արմավիա»-ի աշխատակիցների հայցն ընդդեմ նախկին գործատուի դատարանը դեռ վարույթ չի ընդունել: Այս մասին այսօր «Փաստինֆո»-ի հետ զրույցում տեղեկացրեց դատարան դիմած օդաչուներից մեկը՝ Վարդան Սարգսանը:

Մեր զրուցակիցը նշեց, որ չվճարված աշխատավարձը նախկին գործատուից բռնագանձելու հայցով դիմել է Կենտրոն-Նորք-Մարաշ ընդհանուր իրավասության դատարան եւ առայժմ սպասում է հայցի քննության իր հերթին:

Նա նաեւ տեղեկացրեց, որ ինքն «Արմավիա»-ի աշխատակիցներից միակը չէ, որ փորձում է դատական կարգով ստանալ իր հասանելիք գումարը:

Վարդան Սարգսյանը նշեց, որ ընկերությունն իրեն պարտք է դեռեւս անցյալ տարվա նոյեմբեր ամսից: «Վերջին անգամ հոկտեմբերի աշխատավարձն եմ ստացել անցած տարվա դեկտեմբերի վերջին»,- ասաց մեր զրուցակիցը:

Հիշեցնենք. Ընդդեմ «Արմավիա»-ի դեռեւս մայիս ամսին դատարան էր դիմել նաեւ Պետեկամուտների կոմիտեն’ ընկերությունից օդի հարկի չվճարված գումարները բռնագանձելու հայցով:

Ինքը՝ «Արմավիա»-ն պարտքերը չվճարելը մեկնաբանում է սնանկությամբ, սակայն, մինչ օրս նման հայցով դատարան դեռ չի դիմել, թեեւ ընկերության ներկայացուցիչներն արդեն շուրջ 3 ամիս պարբերաբար հայտարարում են, թե պատրաստվում են դա անել եւ փաստաթղթերն են նախապատրաստում:

Հիշեցնենք, որ իր սնանկ լինելու մասին «Արմավիա»-ն հաղորդագրություն էր տարածել դեռեւս մարտի 29-ին:

Սնանկ ճանաչվելու համար ՀՀ օրենսդրությամբ, մասնավորապես՝ «Սնանկության մասին» օրենքով միայն մեկ տարբերակ է սահմանված, այն է՝ դատարանի համապատասխան վճիռը:

Հակառակ դեպքում, քանի դեռ ընկերությունը սնանկ չի ճանաչվել, պարտավոր է կատարել բոլոր հարկային եւ այլ ֆինանսական պարտավորությունները:

Հեղինակ` Նելլի Դանիելյան