Փաստ ինֆո

«Էթիկայի հանձնաժողովը պետք է քայլեր կատարի, եթե իր որոշումները չեն իրականացվում»,- Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունց այսպես պատասխանեց մեր այն հարցին, թե ինչ քայլեր են պատրաստվում ձեռնարկել, եթե Վանաձորի քաղաքապետը ներողություն չխնդրի իր ղեկավարած համայնքի բնակիչներից:

Հիշեցնենք. Հելսինկյան քաղաքացիական ասամբլեայի Վանաձորի գրասենյակը դիմել էր Բարձրաստիճան պաշտոնատար անձանց էթիկայի հանձնաժողով` Ս.Դարբինյանի հրապարակային ելույթում առկա վիրավորական արտահայտությունները քննելու եւ համապատասխան որոշում կայացնելու համար, ինչին ի պատասխան հանձնաժողովն իր կայացրած որոշման մեջ «առաջարկել» էր Սամվել Դարբինյանին հրապարակավ ներողություն խնդրել եւ տեքստը տեղադրել քաղաքապետարանի կայքում:

Քաղաքապետն էլ դեռ չի ընդունել իրեն արված այդ «առաջարկը»:

Ի դեպ, ինչպես արդեն տեղեկացրել ենք, երեկ Վանաձորի քաղաքապետարանից «Փաստինֆո՚-ին ասացին, որ Հանձնաժողովի որոշումը դեռ չեն ստացել:

Ինչեւէ, անդրադառնալով, հանձնաժողովի կայացրած որոշմանը, Արթուր Սաքւոնցը կարծիք հայտնեց, որ անհրաժեշտ է փոխել այդ կառույցի գործունեությունը կարգավորող իրավական նորմերը, ավելի հստակեցնել ու խստացնել դրանք: «Ոչ միայն զուտ գնահատողական ակտեր լինեն, այլեւ որոշակի վերահսկողություն կամ այդ մարմնի կամ մեկ այլ մարմնի կողմից, որ այդ որոշումներն իիրականացվեն»,- ասաց մեր զրուցակիցը:

Միայն իրավական կարգավորման պարագայում է Արթուր Սաքունցը հնարավոր համարում, որ Հանձնաժողովն ի վերջո ծառայի այն նպատակին, որի համար ստեղծվել է:

«Որպեսզի հանձնաժողովն ազդեցիկություն ունենա, պետք է այնպիսի նորմեր լինեն, որ ապահովեն այդ հանձնաժողովի գործունեության, կայացրած որոշման արդյունավետությունը», -նշեց Արթուր Սաքունցը:

Ի դեպ, Հելսինկյան քաղաքացիական ասամբլեայի Վանաձորի գրասենյակի ղեկավարը տեղեկացրեց, որ իրենք ուսումնասիրելու են ոչ միայն իրենց դիմումի հիման վրա Վանաձորի քաղաքապետի, այլեւ «Թրանսփարենսի Ինթերնեշնըլ» հակակոռուպցիոն կենտրոնի դիմումի հիման վրա` ՊԵԿ նախագահ Գագիկ Խաչատրյանի վերաբերյալ կայացրած որոշումը:

«Դրանք կենթարկվեն խորը ուսումնասիրության, գնահատականներ կարվեն եւ անպայման քայլեր կձեռնարկվեն, առաջարկություններ կլինեն»,- նշեց Արթուր Սաքունցը` չբացառելով, որ առաջիկայում նման օրենսդրական նախաձեռնությամբ հանդես կգա հենց իր ղեկավարած կազմակերպությունը:

Հեղինակ` Նելլի Դանիելյան