Փաստ ինֆո

Երևանի Կենտրոն և Նորք-Մարաշ վարչական շրջանների դատարանում՝ դատավոր Մնացական Մարտիրոսյանի նախագահությամբ,  այսօր սկսվեց  պաշտոնեական լիազորություններն անցնելու և պաշտոնեական կեղծիք կատարելու մեջ մեղադրվող ոստիկանության 2 օպերլիազորի գործով դատաքննությունը: Ամբաստանյալներ, ոստիկանության կենտրոնականի բաժնի օպերլիազորներ Խաչիկ Բախբուդարյանը և Արտակ Բարսեղյանը առաջադրված մեղադրանքում իրենց մեղավոր չճանաչեցին:

Ըստ դատարանի սահմանած ապացույցների հետազոտման կարգի, նախ ցուցմունքներ տվեց գործով տուժող, մեկ այլ գործով  կալանքի տակ գտնվող Ռոբերտ Հովսեփյանը:  Նա հայտնեց, որ 2012թ. հոկտեմբերի 3-ին` ժամը 22. 30-ի սահմաններում իր ընկերների հետ գտնվել է Ռոստոմյան փողոցում, իրենց վրա են հարձակվել մի քանի անձինք և ծեծի ենթարկել իրեն, գցել գետնին, այնուհետև նստեցնելով մեքենա՝  տեղափոխել ոստիկանության Կենտրոնականի բաժանմունք: Այնտեղ օպերլիազոր Խաչիկ Բախբուդարյանը և Արտակ Բարսեղյանը ձեռնաշղթաներ են անցկացրել  տուժողի ձեռքերին և ծեծի ենթարկել՝ ոտքերով, ձեռքերով, մահակով` ստիպելով խոստովանել նախկինում չբացահայտված գողությունների մեջ իր մասնակցությունը։

Տուժողը հայտնեց նաև, որ բացի ամբաստանյալներից իրեն այլ մարդիկ էլ են ծեծել, և ի դեպ, դատարանին խնդրեց  առերեսում անցկացնել՝ ծեծին մասնակից ևս երկու անձանց բացահայտելու համար: Նա միաժամանակ հայտարարեց, որ  իրեն ծեծած այլ մարդկանց  միայն  ոտքերն է տեսել, քանի որ  գետնին ընկած է եղել:

Տուժողը  նշեց նաև, որ Խաչիկ Բախբուդարյանը իրեն ծեծելու ընթացքում ձեռքերի ափերով հարվածել է իր ականջներին, ինչի հետևանքով ձախ ականջի թմբկաթաղանթը ծակվել է և սկսել է վատ լսել։

Ռոբերտ Հովսեփյանը պատմեց նաև, որ իր դիմադրությունը կոտրելու  համար օպերլիազորները 2 արվամոլ են հրավիրել՝ ասելով՝ «եթե չխոստովանես, ապա նրանք քեզ կփչացնեն, ես էլ ասեցի՝ տվեք ստորագրեմ,  մենակ թե ինձ չկպնեն: Իսկ երբ լվացվելուց հետո եկա,  օպերլիազոր Խաչիկ Բախբուդարյանը ինչ-որ հաբ տվեց ու ասաց՝ խմի, դե ես էլ խմեցի, բայց հետո հասկացա, որ «Suboteks» էր, քանի որ նախկինում օգտագործել էի, բայց հիմա չեմ օգտագործում»,- ցուցմունքում ընդգծեց տուժողը:

Ի  պատասխան ամբաստանյալների պաշտպան Արայիկ Ալվանդյանի հարցի,  թե ինչպիսի տեսք են ունեցել օպերլիազորների կողմից հրավիրված արվամոլները և թե ինչպես է տուժողը հասկացել, որ նրանք արվամոլ են, տուժող Ռոբերտ Հովսեփյանը նշեց, որ նրանք 2-ն  էլ կիսաշրջազգեստով, զուգագուլպաներով և կեղծամներով տղամարդիկ էին, «իսկ դա պարզից էլ պարզ է»:

Տուժողը հայտնեց նաև, որ ինքը նյարդային խնդիրներ ունեցել է, ինչը չի նշանակում, որ ինքը տառապում է  հոգեկան հիվանդությամբ:  Տուժողը  ընդգծեց, որ եթե դատապարտվելու է, թող դատապարտվի արածի և ոչ թե չարածի համար և  որ ամեն բան անելու է, որպեսզի այս գործով մեղավորները պատժվեն:

Ի դեպ նշենք, որ տուժող Ռոբերտ Հովսեփյանը ձերբակալվածների պահման վայր տեղափոխվելու հաջորդ օրն իսկ ինքն իրեն վնասել է: Նա հայտարարեց, որ  իրեն հոգեպես սպանել են,  և  որ ինքը  միայն  ֆիզիկապես է ապրում:

Տուժողի մայրը,  գործով վկա Նարինե Ասատրյանը իր հերթին հայտնեց, որ դեպքի օրն իր որդին տանից դուրս է եկել և ծնողներին տեղեկացրել, որ քիչ անց կվերադառնա, սակայն այդ օրը այդպես էլ չի վերադարձել: Ըստ վկայի, ոստիկանությունն իրենց չի իրազեկել, որ որդին իրենց մոտ է, իսկ հաջորդ օրը նա որդուն տեսել է խոշտանգված և ամբողջությամբ կապտուկների մեջ: Վկան 3 անգամ  ապարդյուն պահանջել է  դատաբժշկական փորձաքննություն նշանակել, ապա` դիմում-բողոք է գրել Գլխավոր դատախազին:

Դատական նիստին անընդմեջ խոչընդոտելու համար նախագահող դատավորը ամբաստանյալ Արտակ Բարսեղյանի հոր նկատմամբ կիրառեց դատական սանկցիա՝ նրան դուրս հրավիրեց նիստերի դահլիճից՝ արգելելով  նրան ներկա գտնվել  հետագա դատական նիստերին:

Ապրիլի 10-ի դատական  նիստում դատաքննությունը կշարունակվի:

Նշենք, որ սույն գործով նախաքննությունն իրականացրել է ՀՀ հատուկ քննչական ծառայությունը: