Փաստ ինֆո

Ինքնասպանությունների մեր երկրում կարծես թե աճի միտում են դրսեւորում. գրեթե ամեն օր լսում ու կարդում ենք հերթական ինքնասպանության կամ նման փորձի մասին: Եղանակները տարբեր են` մեկը իրենց տան պատշգամբից է նետվում, մյուսը` երակները կտրում, մեկ ուրիշը կախվում կամ դեղեր խմում:

Քիչ չեն դեպքերը նաեւ, երբ հուսահատված մարդիկ նման ծայրահեղ քայլի են դիմում հանրային վայրերում` կամուրջներից նետվելով:

Մեր հարցմանն ի պատասխան ՀՀ ՔԿ-ից հայտնեցին, որ վերջին 2,5 տարիներին միայն Երեւանի կամուրջներից նետվելու միջոցով գրանցվել է ինքնասպանության 30 դեպք:

Ուսումնասիրությունները ցույց են տալիս, որ կատարված ինքնասպանությունների գերակշիռող մասը եղել է Կիևյան կամրջից` 25-ը, 2-ն ինքնասպանություն են գործել Հաղթանակ կամրջից, իսկ 3-ը՝ Դավթաշեն:

Ընդ որում` ինքնասպանություն գործած անձանցից 28-ը եղել են տղամարդիկ, 2-ը՝ կանայք:

Ինչ վերաբերում այս ծայրահեղ քայլին դիմողների տարիքին, ապա նրանից 13-ը եղել են մինչև 35 տարեկան, իսկ 17-ը՝ 35 տարեկանից բարձր:

Հայտնի է նաև, որ ինքնասպանություն գործած անձանցից 4-ը եղել են հոգեկան հիվանդությամբ տառապող անձինք: Ասել է թե` գերակշիռ մեծամասնություն գիտակցել է իր արարքի լրջությունը, այլ հարց է, թե կատարման պահին ինչ խնդիրներ է ունեցել, որոնց լուծումն ուղղակի չի պատկերացրել կամ որքան հուսահատված եւ հիասթափված է եղել, որ միակ լուծումը պատկերացրել է կյանքին վերջ տալը:

Հիշեցնենք նաև, որ վերջերս գրանցվել մի ողբերգական դեպք Դավթաշենի կամրջից ցած էր ընկել 2004թ ծնված մի տղա: Ճիշտ է` տղան ինքնասպանություն գործելու մտադրություն չի ունեցել եւ տեղի ունեցածը դժբախտ պատահար է, բայց արդյունքում ընդհատվեց մի անմեղ երեխայի կյանք:

Ինքնասպանությունների դեպքերի առնչությամբ «Փաստինֆո»-ի հարցման ի պատասխան Քննչական կոմիտեից հայտնեցին, որ դեպքերի կանխարգելման նպատակով իրենք առաջարկել են արգելապատնեշներ կառուցել՝ պաշտպանիչ ցանցերը, ինչը խոչնդոտներ կստեղծի և հնարավորություն կտա նաև կանխել սուիցիդալ հակումներ ունեցող անձանց նման ծայրահեղ քայլի դիմելուց նաեւ խուսափել նման ծայրահեղ քայլերից:

Աղբյուր` Փաստինֆո